कळवणच्या आश्रमशाळेत विद्यार्थ्याचा मृत्यू; बॉडी 5 तास मुख्याध्यापकांच्या टेबलावर

कळवण: चणकापूर येथील शासकीय आश्रमशाळेतील रोहित विलास बागूल या तिसरीच्या विद्यार्थ्याचा आजारपणामुळे मृत्यू झाला. घटनेनंतर कुटुंबीय, नातेवाइकांनी मुख्याध्यापकासह अधीक्षकाच्या निलंबनाची मागणी करीत मृतदेह पाच तास मुख्याध्यापकांच्या टेबलावर ठेऊन आक्रोश केला. अप्पर आयुक्त दिनकर पावरा यांनी दोघांचे तत्काळ निलंबन केल्यानंतर नातेवाइकांनी मृतदेह ताब्यात घेतला.

रोहितला शुक्रवारपासून ताप, उलट्या आदी त्रास होत होता. अधीक्षक संजय नांदणे यांनी दुसऱ्या विद्यार्थ्याचे पालक गुलाब बागूल यांच्याबरोबर रोहितला घरी पाठवून दिले. घरी गेल्यानंतर तो तापाने फणफणल्याने पालक त्याला मध्यरात्री अभोणा येथे उपचारांसाठी घेऊन गेले. परंतु, रात्री उशीर झाल्यामुळे त्याला उपचार मिळाले नाहीत. रविवारी रात्री उशिरा रोहितचा मृत्यू झाला.

सोमवारी रोहितचे पालक, नातेवाइक व आदिवासी बांधवांनी मृतदेह आश्रमशाळेचे मुख्याध्यापक बालाजी भुजबळ यांच्या टेबलावर आणून ठेवला. मुख्याध्यापक व अधीक्षक यांना निलंबित करून गुन्हे दाखल होत नाहीत, तोपर्यंत मृतदेह उचलणार नाही, असा पवित्रा घेतला. अप्पर आयुक्त पावरा, प्रकल्पाधिकारी अकुनुरी नरेश यांनी कारवाईचे लेखी आश्वासन दिल्यानंतर पाच तासांनी नातेवाइकांनी मृतदेह ताब्यात घेतला.

मुख्याध्यापक, अधीक्षक निलंबित

या प्रकरणाच्या प्राथमिक चौकशीत मुख्याध्यापक बालाजी भुजबळ आणि अधीक्षक संजय नांदणे यांनी गंभीर निष्काळजीपणा केल्याचे समोर आले. त्यामुळे या दोघांना तातडीने निलंबित करण्यात आल्याचे पावरा यांनी घोषित करीत निलंबनांचे आदेश नातेवाइकांना दिले.